இலங்கை கடற்படையுடன் இணைந்து ரக்னா அரக்ஷக பாதுகாப்பு நிறுவனம் முன்னெடுத்து வந்த கடல்சார் பாதுகாப்பு சேவையில் எவன்கார்ட் நிறுவனத்தைச் சேர்ப்பதற்கு நடவடிக்கை எடுத்தமை தொடர்பில், இலஞ்சம் அல்லது ஊழல் பற்றிய குற்றச்சாட்டுக்களை விசாரணை செய்வதற்கான ஆணைக்குழு மற்றும் குற்றப் புலனாய்வுத் திணைக்களத்தில் முறைப்பாடு செய்ய நடவடிக்கை எடுப்பதாக கோப் குழு (பொது நிறுவனங்கள் பற்றிய குழு) தெரிவித்துள்ளது. 

குறித்த கடல்சார் பாதுகாப்பு நடவடிக்கைகளுக்காக எவன்கார்ட் தனியார் நிறுவனத்தைச் சேர்த்துக் கொண்டமையினால் அரசாங்கத்திற்கு பெருந்தொகை பணம் இழக்கப்பட்டுள்ளதாகக் கோப் குழுவின் தலைவர் வைத்தியர் நிஷாந்த சமரவீர குறிப்பிட்டுள்ளார். 

ரக்னா லங்கா நிறுவனத்தின் அதிகாரிகள் அண்மையில் கோப் குழுவின் முன்னிலையில் அழைக்கப்பட்டிருந்த நிலையில், அங்கு இந்த கடல்சார் பாதுகாப்பு நடவடிக்கைகளுக்காக எவன்கார்ட் நிறுவனத்தைச் சேர்த்துக் கொண்டது தொடர்பில் கோப் குழுவின் தலைவர் கேள்வியெழுப்பியிருந்தார். 

கடல்சார் பாதுகாப்பு நடவடிக்கைகளுக்காக எவன்கார்ட் நிறுவனத்தைச் சேர்த்துக் கொள்வதற்கான ஒப்பந்தம் எந்தத் தரப்பின் தேவையின் பேரில் மேற்கொள்ளப்பட்டது என்பது குறித்து இதன்போது கோப் குழுவின் உறுப்பினரான பாராளுமன்ற உறுப்பினர் தயாசிறி ஜயசேகரவும் கேள்வியெழுப்பியிருந்தார். 

இதற்கமைய, இந்த நிறுவனம் தொடர்பில் உள்ள அனைத்து ஒப்பந்தங்களையும் ரத்து செய்வதற்கும், இதன் மூலம் அரசாங்கத்திற்கு ஏற்பட்ட நஷ்டத்தை மீளப் பெற்றுக்கொள்வதற்கான சாத்தியக்கூறுகள் தொடர்பிலும், அதற்கு ஒத்துழைப்பு வழங்கிய அனைவருக்கும் எதிராக சட்டத்தை நடைமுறைப்படுத்துவதற்கும் தேவையான நடவடிக்கைகள் எடுக்கப்படும் என கோப் குழுவின் தலைவர் நிஷாந்த சமரவீர மேலும் தெரிவித்துள்ளார்.