தென்னிந்தியத் திரையுலகின் பிரபல நடிகரான ஃபஹத் ஃபாசில், தனது சிறுவயதில் நடிகர் விஜய்யைச் சந்தித்த சுவாரஸ்யமான அனுபவத்தை நேர்காணலொன்றில் பகிர்ந்துள்ளார். 

பிரபல இயக்குநர் ஃபாசில் இயக்கிய ‘காதலுக்கு மரியாதை’ (1997) திரைப்படத்தின் படப்பிடிப்பு, அவர்களது குடும்ப வீட்டில் நடைபெற்றபோது 12 அல்லது 13 வயதாக இருந்த ஃபஹத் ஃபாசில் விஜய்யைச் சந்தித்துள்ளார். 

அப்போது விஜய் தன்னிடம், "எதிர்காலத்தில் நடிகராக வருவீர்களா?" என்று முதன்முறையாகக் கேட்டதாக ஃபஹத் நினைவுகூர்ந்துள்ளார். 

அக்காலகட்டத்தில் திரைப்படங்கள் குறித்தே இருவரும் பேசியதாகவும், பின்னர் ஃபாசில் இயக்கிய ‘கண்ணுக்குள் நிலவு’ படப்பிடிப்பின்போது, தான் அடுத்து நடிக்கவிருந்த ‘குஷி’ திரைப்படம் குறித்து விஜய் தன்னிடம் பகிர்ந்துகொண்டதாகவும் அவர் தெரிவித்தார். 

அந்தச் சிறுவயது சந்திப்பின்போது, விஜய் எதிர்காலத்தில் அரசியலுக்கு வந்து தமிழ்நாட்டின் முதலமைச்சராகும் அளவுக்கு வளர்வார் என்று தான் கனவிலும் நினைத்துப் பார்க்கவில்லை எனவும் ஃபஹத் ஃபாசில் குறிப்பிட்டுள்ளார். 

தனது முதல் திரைப்படமான ‘கையெத்தும் தூரத்து’ எதிர்பார்த்த வெற்றியை பெறாததால் சில ஆண்டுகள் அமெரிக்காவில் வசித்ததாகவும், பின்னர் மலையாளத் திரையுலகிற்குத் திரும்பி வெற்றிகரமான நடிகராக உருவெடுத்ததாகவும் அவர் தெரிவித்தார். 

ஷஷாங்க் யெலெட்டி இயக்கத்தில் ஃபஹத் ஃபாசில் நடித்துள்ள ‘டோண்ட் ட்ரபிள் தி ட்ரபிள்’ (Don’t Trouble The Trouble) திரைப்படம் நாளை (2)வெளியாகவுள்ள நிலையில், அதற்கான விளம்பர நிகழ்வுகளின்போதே அவர் இந்தக் தகவல்களைப் பகிர்ந்துள்ளார்.