Sep 21, 2026 - 06:45 PM
சவூதி அரேபியாவில் சட்ட நடவடிக்கையை எதிர்நோக்கியுள்ள சிவரசா அனோஜனுக்கு மன்னிப்பு வழங்குமாறு கோரி, சவூதி அரேபிய மன்னர் சல்மான் பின் அப்துல் அஸீஸ் அல் சவூத்துக்கு விசேட கோரிக்கை மனுவொன்றை சமர்ப்பிக்க அகில இலங்கை மக்கள் காங்கிரஸ் நடவடிக்கை எடுத்துள்ளது.
சவூதி அரேபியாவில் தண்டனை பெற்றுவரும் சிவரசா அனோஜன் அவர்களின் வழக்கு தொடர்பில் கருணை அடிப்படையிலான பரிசீலனையையும் மன்னிப்பையும் கோரி, இந்த மனு தாக்கல் செய்யப்படவுள்ளது.
குறித்த மனுவில் பாராளுமன்ற உறுப்பினர்களின் கையொப்பங்களை சேகரிக்கும் பணி தற்போது ஆரம்பிக்கப்பட்டுள்ளது.
இது தொடர்பில், அகில இலங்கை ஜம்இய்யத்துல் உலமா (ACJU), தேசிய ஷூரா சபை மற்றும் இலங்கை முஸ்லிம் ஊடக மன்றம் ஆகியவற்றுக்கு கடிதம் மூலம் கோரிக்கை விடுக்கப்பட்டுள்ளது.
சிவரசா அனோஜனின் வழக்கில் தங்களது ஆதரவை வழங்குவதுடன், இலங்கையிலுள்ள சவூதி அரேபிய இராஜதந்திர தூதரகத்தின் ஊடாக சவூதி அரேபிய மன்னரிடம் மரியாதையுடன் வேண்டுகோள் விடுத்து, அனோஜனின் வழக்கை கருணையுடன் பரிசீலிக்குமாறு கோரப்படவுள்ளது.
இந்த இக்கட்டான நிலையில் சிவரசா அனோஜனுக்கும், அவரது குடும்பத்தினருக்கும் ஆதரவாக சாத்தியமான அனைத்து வழிகளும் முன்னெடுக்கப்படும் என அகில இலங்கை மக்கள் காங்கிரஸ் தெரிவித்துள்ளது.
