போதைப்பொருள் கடத்தல் மூலம் சட்டவிரோதமாக ஈட்டப்பட்டதாக சந்தேகிக்கப்படும் 475 இலட்சம் ரூபாய்க்கும் அதிகமான பெறுமதியுடைய பல சொத்துக்களை முடக்குவதற்கு சட்டவிரோத சொத்துக்கள் விசாரணைப் பிரிவு நடவடிக்கை எடுத்துள்ளது.

பதவிய பராக்கிரமபுர பிரதேசத்தைச் சேர்ந்த நபர் ஒருவர் போதைப்பொருள் கடத்தல் மூலம் சொத்துக்களை ஈட்டியுள்ளதாக குற்றப் புலனாய்வுத் திணைக்களத்திற்கு கிடைத்த முறைப்பாட்டை பொலிஸ் மா அதிபர், சட்டவிரோத சொத்துக்கள் விசாரணைப் பிரிவுக்கு அனுப்பி வைத்துள்ளார்.

அதன்படி மேற்கொள்ளப்பட்ட விசாரணையில், குறித்த நபர் சட்டவிரோதமாக ஈட்டிய பணத்தைப் பயன்படுத்தி சொத்துக்கள் மற்றும் வாகனங்களை கொள்வனவு செய்துள்ளமை தெரியவந்துள்ளது.

அவற்றில், அவரது மனைவியின் பெயரில் புதிய நகர், பதவிய பிரதேசத்தில் கொள்வனவு செய்யப்பட்ட சுமார் 275 இலட்சம் ரூபாய் பெறுமதியுடைய 15 பேர்ச்சஸ் காணியும் அதில் கட்டப்பட்டுள்ள இருமாடி கட்டிடமும் அடங்குகின்றன.

மேலும், அனுராதபுரம் விஜயபுர பிரதேசத்தில் அமைந்துள்ள சுமார் 120 இலட்சம் ரூபாய் பெறுமதியுடைய 15 பேர்ச்சஸ் காணியும் அதில் கட்டப்பட்டுள்ள வீடும், சுமார் 65 இலட்சம் ரூபாய் பெறுமதியுடைய வேன் ஒன்றும் மற்றும் சுமார் 15 இலட்சம் ரூபாய் பெறுமதியுடைய சிறிய லொறி ஒன்றும் விசாரணைகளின் போது அடையாளம் காணப்பட்டுள்ளன.

பணச்சலவை தடுப்புச் சட்டத்தின் கீழ் குற்றம் புரிந்தமை தொடர்பில் 47 வயதான சந்தேகநபரும் அவரது 45 வயதான மனைவியும் கைது செய்யப்பட்டுள்ளனர்.

குறித்த சொத்துக்கள் மற்றும் வாகனங்கள் உட்பட சுமார் 475 இலட்சம் ரூபாய் பெறுமதியுடைய சொத்துக்களை 2026 செப்டம்பர் 22 ஆம் திகதி முதல் 14 நாட்களுக்கு முடக்குவதற்கான உத்தரவு பிறப்பிக்கப்பட்டுள்ளது.

சட்டவிரோத சொத்துக்கள் விசாரணைப் பிரிவினர் இது தொடர்பான மேலதிக விசாரணைகளை மேற்கொண்டு வருகின்றனர்.