Nov 10, 2026 - 10:51 AM
By யாழ். நிருபர் பிரதீபன்
By யாழ். நிருபர் பிரதீபன்
மாமனிதர் நடராசா ரவிராஜின் 20 ஆவது ஆண்டு நினைவேந்தல் நிகழ்வுகள் யாழ்ப்பாணத்தில் நடைபெற்றன.
சாவகச்சேரி பிரதேச செயலகத்திற்கு முன்னால், அமைந்துள்ள மாமனிதர் ரவிராஜ் நினைவு சதுக்கத்தில் நடைபெற்ற நிகழ்வில் ரவிராஜின் பாரியார் சசிகலா ரவிராஜ் உள்ளிட்ட குடும்ப உறுப்பினர்கள், அரசியல் பிரமுகர்கள், செயற்பாட்டாளர்கள் உள்ளிட்டோர் கலந்து கொண்டு உருவ சிலைக்கு மலர் மாலை அணிவித்து, மலர் தூவி அஞ்சலி செலுத்தினர்.
பிரபல சட்டத்தரணியும் யாழ்ப்பாண மாவட்ட தமிழ்த் தேசியக் கூட்டமைப்பின் முன்னாள் பாராளுமன்ற உறுப்பினருமான நடராஜா ரவிராஜ், யாழ்ப்பாணம் சாவகச்சேரியைப் பிறப்பிடமாகக் கொண்டவர். தமிழர் விடுதலைக் கூட்டணியின் (TULF) மூலம் தனது அரசியல் பயணத்தைத் தொடங்கினார். 2001 ஆம் ஆண்டு யாழ்ப்பாண மாநகர முதல்வராக தெரிவானார்.
அதனை தொடர்ந்து 2001 மற்றும் 2004 ஆம் ஆண்டுகளில் நடைபெற்ற பாராளுமன்றத் தேர்தல்களில் தமிழ் தேசியக் கூட்டமைப்பு சார்பில் போட்டியிட்டு, யாழ். மாவட்ட பாராளுமன்ற உறுப்பினராகத் தெரிவானார்.
தமிழ் மக்களுக்கு எதிராக நடந்த மனித உரிமை மீறல்கள், பொதுமக்கள் காணாமல் போதல் மற்றும் இராணுவ அத்துமீறல்களுக்கு எதிராகத் துணிச்சலாகக் குரல் கொடுத்தார். சிவில் உரிமைகளுக்கான அமைப்புகளை உருவாக்கிப் பணியாற்றினார்.
தமிழ் மற்றும் சிங்கள மொழிகளில் சரளமாகப் பேசக்கூடியவர். சிங்கள ஊடக விவாதங்களில் கலந்துகொண்டு தமிழ் மக்களின் நியாயமான உரிமைகளையும் அமைதித் தீர்வின் அவசியத்தையும் சிங்கள மக்களுக்குப் புரிய வைக்கும் வகையில் தெளிவாக எடுத்துரைத்தார்.
அந்நிலையில் 2006 ஆம் ஆண்டு நவம்பர் 10 ஆம் திகதி , கொழும்பில் உள்ள தனியார் சிங்கள ஊடகம் ஒன்றிற்கு நேர்காணல் ஒன்றினை வழங்கி விட்டு, வீடு திரும்பிய பின்னர் மீண்டும் தனது வீட்டிலிருந்து வெளியேறியபோது, நாரஹேன்பிட்டிய பகுதியில் ஆயுததாரிகளால் சுட்டுக்கொல்லப்பட்டார்.